阿潘精品遊: 【試住系列】豪歎全球最高海拔國際五星級酒店

用黃金造泳池的確幾有氣派，不過酒店話呢個泳池主要用黎裝飾多，唔鼓勵大家去游，免大家太過劇烈運動引發高山症。此圖由 ( The St. Regis Lhasa Resort 提供)

從雜誌、報紙睇到唔少報導The St. Regis Lhasa Resort，呢間位於世界最高海拔三千多米既五星級國際酒店，究竟有幾豪華、又幾環保？一直都好想住，結果上次西藏之行中，終於有機會試住 2 日 1 夜！

撰文、攝影︰潘蔚能 Travelzoo 香港主編
旅遊小貼士互動分享，立即登入：https://www.facebook.com/poonwainang

尊貴豪華客房

西藏拉薩雖然唔及中國沿海城市富裕，但係其實硬件設施唔會差得去邊，未去拉薩既時候，好難想像會有外資企業興建一間咁豪華酒店。酒店開業時間2010年11月15日，開業未足兩年，相當新淨。雖然酒店都屬於市中心地帶，布達拉宮、大昭寺、夏宮羅布林卡等重要景點都係附近。網上有資料更話步行僅需十分鐘，就可以抵達最旺既八廓街購物區和大昭寺。但我勸大家唔好行，因為係高原行街唔係咁盞，叫架的士去亦都唔貴。

由 Jean Michel Gathy 親自拍攝的西藏沙龍照，你覺得靚唔靚？

酒店雖然係豪華五星級，但設計非常內歛，並唔係一味用金碧輝煌黎營造氣派。當我一踏入酒店，就會感覺到將整座布達拉宮既設計融入其中，但同時又加入綠柳河畔的江南園林景緻。當你印象中以為西藏係一個好荒涼、氣候好惡劣既地方，而你置身酒店，就正好係沙漠綠洲既感覺。呢種反差令你更主觀覺得酒店寧舍舒服，唔知係咪設計師當時既原意呢？

空間感非常之大，真正有五星級感覺

酒店內共有一百五十間套房，
十二棟別墅和一間總統套房，圖為房內祥雲掛畫

據資料顯示，酒店原址是舊區西藏市政府辦公樓，由曾設計北京安縵頤和及馬爾代夫One & Only酒店的頂級設計師Jean Michel Gathy建造，大堂仲放置唔少西藏古董文物，都幾有博物館感覺。

尊貴豪華客房擁有超大花園

我主觀覺得係一個好現代化城市入住五星級酒店，有時未必真係享受到五星級既感覺。反而，係一些相對冇咁發達地方，就算入住級數最低房種，依然有一個所謂「豪華」待遇。而我今次試住既房種叫「尊貴豪華客房」，並唔係最高級既一種，但足以令你覺得媲美套房既感覺。房間面積好大，大概有千三尺左右，有明顯的劃分既區間，如書房、廳、浴室以及洗手間等。

可選花曬或浸浴，當然要享受呢個咁獨特浴缸啦

洗手間有兩個面盤，早上起身唔駛爭黎用

整間房空間感其實好大，樓底好高，而且整間房都係由落地玻璃設計，視覺上將室外花園連成，呢種感覺就算一些香港所謂「豪宅」都做唔到。事實上，我最欣賞就係房既設計，係可以一推開玻璃門就出花園既感覺。縱使呢個花園唔係私人，但係一起身就可以行出花園，確實滿足少少做富豪既感覺。

另一個驚喜之處竟然係電視，並唔係什麼名牌、HD電視，而係竟然可以睇到香港電視！可能好多朋友覺得唔係咩大不了，但係大陸仲要係西藏，本來上網睇唔到香港報紙，上唔到Facebook，但竟然睇到香港電視仲要係新聞，呢種感覺對於我黎講真係有點不可思議呢！

禁禁下電視比我搵到now 財經台

作為一間國際五星級酒店，除左硬件上做得到之外，服務先至係最重要。酒店提供既廿四小時管家服務，做得相當體貼，無論一個燈泡壞了、門窗開得唔順都會即時處理，又會為你即時送上熱茶、生果，非常體貼。據講，如果你入住期間有高山症既話，酒店同醫院有直接聯系，會即時送你入院，幸好，我冇機會去試個服務。整體黎講，無論環境、服務都唔似有返左國內，呢樣野唔係咁多國內五星級酒店可以做得到。

號稱高原低碳酒店

聽到有些朋友講，西藏起間咁豪酒店，污染左呢個地方，我就覺得冇咁誇張。始終，一個地方有左經濟實力，最終都會改善一下民生。反而，多左酒店興建，多左旅客會唔會真係帶黎左實際環境污染呢？酒店就話佢地係用太陽能電板及地下水循環系統等節能設備，垃圾都會分類或者循環，酒店裡面係用電車行駛，盡量做到減少污染咁話。